BRTAk zientziari eta teknologiari buruzko udako ikastaroa antolatu du, Euskadiren autonomia estrategikoan aurrera egiteko

Uztailaren 3an eta 4an, Basque Research & Technology Alliancek (BRTA) “Euskadiko autonomia estrategikoan aurrera egiteko Km 0-ko  Zientzia eta teknologia” udako ikastaroa antolatuko du. Donostian izango da, Donostiako Miramar Jauregian, eta gai horretan adituak direnek hartuko dute parte. 

Ekonomia ez da berdina pandemia edo Ukrainako gerra bezalako gertaeren ondoren. Ezegonkortasunak, ziurgabetasunak eta horniduren eskasiak agerian utzi dute eskualdeen eta industriaren autonomia handitzeko beharra. Euskadik erresilientzia, sendotasuna eta lehiakortasuna bermatu behar ditu, eta horretarako bere autonomia estrategikoa handitu behar du. 

Udako ikastaro honetan, BRTAk industrian, energian, osasunean eta elikaduran duen ikerketa-agendak trantsizio hirukoitzaren esparruan autonomia estrategiko horri nola laguntzen duen aztertuko da (teknologiko digitala, ingurumen-energia eta demografiko-soziala). Horretarako, sektoreko adituak izango dira bertan, Carlos Ander Garbisu Crespo Neiker-eko zuzendari zientifikoa; Miren Arantza Madariaga Aberasturi Elika Fundazioko zuzendaria; José Ignacio Hormaeche Euskal Herriko Energia Klusterreko zuzendari nagusia; eta Luis Rosa Pedrosa Tecnaliako Energia, Klima eta Hiri-trantsizioko estrategia-zuzendaria. 

Gai horietan interesa duten guztientzat da jardunaldia, eta izena emateko epea zabalik dago. Gaztelaniaz eta euskaraz izango da, eta itzulpen-zerbitzua prestatuko da edozein hizkuntzatan jarraitzeko.