CampTecnológico ekimenak edizio hibrido berri bat abiarazi du onlineko eta aurrez aurreko tailerrekin
Programak 10 urte daramatza STEAM bokazioak sustatzen
CampTecnológico ekimenak neska-mutil eta nerabeei zuzendutako eskaintza zabaldu du bere 10. edizioan, aukera eskainiz udalekuak online egiteko. Hala, ekimenak programazioari, elektronikari eta robotikari buruzko astebeteko ikastaroak eskaintzen ditu. Ikastaro horiek sei autonomia erkidegotan banatuta dauden bederatzi egoitzetan egin daitezke, edo bestela, etxetik, edonon kokatuta dagoela ere.
CampTecnológico proiektuaren helburua da teknologiarekiko interesa piztea neska-mutil gaztetxoen artean, modu ludiko batean. Horretarako, adinaren araberako mintegi-programa zabal bat eskaintzen die 5-17 urte bitarteko gaztetxoei. Ikasleek hainbat ikastaroren artean aukeratu dezakete: programazioaren hastapenak Scratch-ekin, Minecraft bideo-jokoen sorkuntza, robotika Arduino-rekin, 3D diseinua edo Gauzen Interneten oinarritutako proiektuak, besteak beste. “Konponbide horiek gero eta ohikoagoak dira gizartean”, azaldu zuen Jesús Ángel Bravok, CampTecnológico programaren zuzendariak mintegien aurkezpenean, “konponbide berri horiek nola eraikitzen diren jakinda aukera profesional asko irekitzen dira”.
Kanpaldiak -onlineko formatuan eta aurrez aurrekoan- astebetekoak dira eta parte-hartzaileek 2 orduko iraupena duten eta egunero eskaintzen diren hainbat saioren artean aukeratu dezakete. Gainera, robotikako tailerretan, ikasle bakoitzak lanerako kit propio bat jasoko du, eta beretzat izango da ikastaroa amaitutakoan. Aurrez aurreko aukerari dagokionez, hiriko kanpaldiak egingo dira Bilbo, Gasteiz, Donostia, Santander, Madril, Bartzelona, Vall d’Aran, Valentzia eta Toledon, eta ostatudun udaleku bat ere bai Vall d’Aranen. Bestalde, onlineko tailerrak munduko edozein txokotatik egin ahal izango dira, eta programatutako jarduerak eskainiko dira irailaren 5era arte.
Aurrez aurreko tailerretako parte-hartzaile guztien segurtasuna bermatzeko, antolatzaileek higiene-neurri bereziak ezarri dituzte, taldeak txikiagoak izango dira, eta osasun arloko gomendio guztiak beteko dira. CampTecnológico proiektua 2011n sortu zen Bizkaian, zientzia eta teknologiarekiko bokazioa sustatzeko gaztetxoen artean. Harrezkero, hezkuntza arloko eskaintza zabaltzen joan da Estatu osoan ireki dituen egoitzetan, eta 25.000 neska-mutil igaro dira antolatutako mintegietatik.
Lotutako albisteak
Lehendakariak I+Med laborategiko instalazio berriak bisitatu ditu, munduko lehen Nanohidrogel Adimendunen Institutu Biomedikoa
"Gure helburua da gero eta ikertzaile eta ekintzaile gehiago egoteko baldintza egokienak sortzea"
Bianditz, esku-erremintak, doitasuneko piezak eta kautxuzko injekzio-moldeak fabrikatzen dituen 60 urteko enpresa
Irunen kokatuta dagoen konpainiak, azken urtean fakturazioa % 30 handitu duenak, SPRI Taldearen zibersegurtasun-programako laguntza jaso du
“Innovation Land” lelopean, Euskadik Transfiere 2025 Europako zientzia, teknologia eta berrikuntzarako fororik handienean parte hartuko du
Euskadik presentzia nabarmena izango du programa ofizialean, Basque Research and Technology Alliance (BRTA) aliantzako, SPRI Taldeko, Tecnaliako eta ZITUko arduradunek parte hartuko baitute
TH Company, munduko liderra arrantza sektorerako makinetan Mungiatik
Mundu osoko 500 atunketari baino gehiagok dute enpresa horren teknologia eta % 75eko merkatu-kuota du.
Infinite proiektuak kontakturik gabe monitorizatzen du egitura aeronautikoen bizi-zikloa
Ideko zentro teknologikoak gidatutako proiektu europar honek mikrohariak erabiltzen ditu karbono-zuntzen egituren egoera kontrolatzeko, haien kalitatea ziurtatzeko, piezak sentsore kableatuekin hornitu beharrik gabe.