Danobatek fabrikazioa irauli du doitasunezko robot berritzaile batekin
- Euskal fabrikatzailea robotikaren sektorean sartu da diseinu disruptibo batekin: doitasun eta dinamika handia eskatzen duten eragiketetarako berariaz diseinatutako robot eredu berritzaile batekin.
- Teknologia horrekin, Danobatek fabrikazio prozesuak eraldatu eta industriari soluzio malgu eta efiziente bat eskaini nahi dio.
Danobat makina-erremintaren euskal fabrikatzaileak robotika industrialaren sektorean sartu dela iragarri du, DMTR gama aurkeztuta, industrian mugarri den garapena. Doitasunezko robot berri horiek zehaztasun eta eraginkortasun estandarrak birdefinitzen dituzte, robot baten malgutasuna eta makina-erreminta baten egonkortasuna eta doitasuna uztartzen dituen soluzio aitzindari bat eskainiz.
DMTR gamak, beste soluzio batzuekin alderatuta, errepikagarritasunari eta zehaztasunari dagokienez, prestazio hirukoitza eskaintzen du eragiketa kritikoetan, hala nola, zulatzean, errematxatzean eta hariztatzean. Gainera, ibilbideak hiru aldiz zehaztasun handiagoz jarraitzeko duen gaitasunak aukera ezin hobea bihurtzen du mekanizazio konplexuetarako eta doitasun handiko fabrikazio gehigarrirako. Beste puntu bereizgarri gako bat programazioa da, zenbakizko kontrola (CNC) erabiltzen baitu, teknologia horrekin lan egitera ohituta dauden enpresetan integratzea sinplifikatuz.
IDEKO zentro teknologikoarekin lankidetzan, Danobatek robotentzako dinamika eta kontrol sistema espezifikoak garatu ditu, eta gaitasun teknologiko berriak ezarri ditu, artearen egoeratik haratago. Xabier Alzaga Danobateko CEOaren arabera, “DMTR gamak makina-erreminta baten doitasuna eta egonkortasuna konbinatzen ditu sei ardatzeko robot baten arintasunarekin eta malgutasunarekin, eta ekoizpen modu berriak irekitzen ditu sektore giltzarrietarako, hala nola aeronautikarako, automobilgintzarako eta energiarako”.
Errendimendu handiagorako diseinu sendoa
Makina-erremintaren ezaugarriak robot baten arkitekturarekin integratzen dituen diseinu bati esker, DMTRek bibrazioak egungo robotek baino 10 aldiz gehiago murrizten dituzte, eta horregatik, mekanizazioko eragiketetako ziklo denborak % 20 laburragoak dira. Ikuspegi horrek produktibitatea handitzeaz gain, aplikazio kritikoetan kalitate handiagoa ere bermatzen du.
Material konposatuetan edo altzairuan zintak jartzeko eragiketetatik hasi eta errematxatu, sistemak muntatu edo 3D inprimatu arte, DMTR robotak malgutasunagatik eta aplikazio industrialen tarte zabal batera egokitzeko gaitasunagatik nabarmentzen dira.
Hainbat modelo daude. Bertsio trinkoak , 70 kg-rainoko karga erabilgarria maneia dezake eta 2,2 metroko irismena du, eta modelorik sendoenak 3,6 metroko irismena du eta 520 kg-rainoko kargak maneiatzeko gai da. Aldakortasun horri esker, Danobatek merkatuko eskaera zorrotzenak bete ditzake, aplikazio bakoitzean zehaztasuna eta errendimendua ziurtatuz.
DMTR gamarekin, Danobatek gaur egungo prozesuak optimizatzeaz gain, manufaktura aurreratuko aukera berriei ere atea irekitzen dien tresna bat jartzen du fabrikatzaileen esku, berrikuntza teknologikoan duen lidergoa sendotuz.
Teknologia hori Eusko Jaurlaritzaren Hazitek programak finantzatutako I+G proiektu baten esparruan garatu da, eta lehen aldiz aurkeztuko da JEC World nazioarteko azokan, 2025eko martxoaren 4tik 6ra, Parisen.
Danobati buruz
Danobat makina-erremintaren fabrikatzaileak 70 urteko esperientzia du fabrikazio soluzio aurreratuak, balio erantsi handikoak eta eskaerapean konfiguratuak diseinatzen eta garatzen. Aeronautika edo automobilgintza bezalako sektoreetako enpresa liderrekin eta liderrentzat lan egiten du enpresak. Bere makinen katalogoan artezteko makinak, tornuak eta CNC robot bidezko mekanizazio sistemak daude, besteak beste. Kooperatiba Danobatgroup industria taldekoa da, 1.400 pertsona baino gehiago enplegatzen dituena eta Mondragon Korporazioan integratuta dagoena. Egoitza nagusia Elgoibarren du (Gipuzkoa, Espainia), eta Danobatek ekoizpen lantegiak eta zerbitzu eta salmenta bulegoak ditu Alemanian, Herbehereetan, Italian, Txinan, Mexikon edo Estatu Batuetan.
Lotutako albisteak
Talleres Altube, doitasuna nortasunean daraman Gipuzkoako mekanizazio-enpresa
Bergarako konpainiak SPRI Taldearen zibersegurtasun-programako laguntza bat jaso du, eta negozioa % 50 handitzea espero du 2027rako
CIC biomaGUNEk enpresa bat abiarazi du, nanosentsoreak erabiliz gaixotasunen diagnostikoa eraldatzeko
Taldeki Biosolutions enpresak antigorputzak azkar, merke eta sendotasunez detektatzeko sentsoreak garatuko ditu, egungo in vitro diagnostikoaren egonkortasun- eta kostu-arazoak gainditzeko
Hazitek proiektu batek Hesteetako Gaixotasun Inflamatoriorako diagnostiko-sistema eta terapia berriak garatu ditu
HANTURA, Faes Farma buru duela, sendagai berriak, gaixotasunaren tratamendurako alternatiba terapeutiko berrien garapenean egindako aurrerapenak eta pazienteen zaintza asistentziala hobetzeko tresna digitalak lortu ditu.
Tamag mikroteknologietan erreferente bihurtu nahi da nazioartean
Donostiako mikroETEak produktu berrien garapenari eta mikrohari amorfo magnetikoen elaborazioari aplikatutako I+Gn zentratzen du bere jarduera.
Teknikerrek errepideen mantentze adimenduna bultzatzen du teknologia robotiko aurreratuaren bidez
Zentro teknologikoak errepideak diseinatzeko, eraikitzeko eta mantentzeko teknologia robotikoak eta automatizazio adimendunak hornitzeko lanak gidatu ditu Europako Omicron proiektuan.