Eusko Jaurlaritzak BRTA, Euskadiko zientzia- eta teknologia-partzuergoa aurkeztu du
Horren helburu nagusia da Euskadiko teknologia- eta industria-erronkei aurre egin eta Euskadik nazioartean duen posizionamendua hobetu ahal izateko lankidetza-dinamika ziurtatzea
Zuzenbide publikoko erakunde gisa eratu da, Eusko Jaurlaritzaren, SPRI taldearen, foru-aldundien eta ZTBESko 16 zientzia- eta teknologia-agenteren arteko lankidetza-hitzarmenaren bidez
BRTA partzuergoak zenbait gaitasun koordinatzen ditu, eta horrek Euskadiko I+G jardueraren gastuaren % 22 inguru exekutatzen du
Rikardo Bueno Zabalo izendatu dute BRTAren zuzendari
Iñigo Urkullu Lehendakariak, gaur goizean, Basque Research and Technology Alliance (BRTA) zientzia- eta teknologia-partzuergoa aurkeztu du. Aurkezpen-ekitaldian Arantxa Tapia Ekonomiaren Garapeneko eta Azpiegituretako sailburuak parte hartu du -bera izango da BRTAren burua- eta bertan egon dira dagoeneko Partzuergoaren kide diren zentro guztietako kideak eta baita hiru Foru Aldundiak. Aldundiek gaur bertan, ekitaldi aurretik egin den Batzar Nagusian jaso dute Partzuergoko kide izateko onespena.
Basque Research and Technology Alliance (BRTA) partzuergoa Eusko Jaurlaritzaren, SPRI taldearen, Arabako, Bizkaiko eta Gipuzkoako foru-aldundien eta Zientzia, Teknologia eta Berrikuntzako Euskal Sareko 16 zientzia- eta teknologia-agenteren arteko lankidetza-hitzarmenaren bidez sortu da. 16 agente horiek honako hauek dira: elkarlaneko 4 ikerketa-zentro –CIC Biogune, CIC Nanogune, CIC Biomagune eta CIC Energigune– eta 12 teknologia-zentro –Tecnalia, Tekniker, Ikerlan, Ceit, Cidetec, Vicometch, Gaiker, Azti, Neiker, Ideko, Azterlan eta Lortek–. Horren helburu nagusia da Euskadiko etorkizuneko teknologia- eta industria-erronkei aurre egin eta Euskadik nazioartean duen posizionamendua hobetu ahal izateko lankidetza-dinamika ziurtatzea. Egoitza Gipuzkoako Mendaro udalerriko Kurutz-Gain industrialdean dago.
109/2015 Dekretua betetzeko, Eusko Jaurlaritzak Zientzia, Teknologia eta Berrikuntzako Euskal Sarea (ZTBES) berrantolatzeko prozesua abiarazi zuen; horren bidez, aurreko legegintzaldian, I+Gko politika arrakastatsuak izan ziren. Baina, nahiz eta Euskadik zientzia- eta teknologia-arloko goi-mailako trebakuntzako eta gaitasuneko zentroen sare garrantzitsua izan, oso heterogeneoa da. Beraz egiaztatu zen beharra zegoela herrialdeko zentroak batuko zituen eta dagoeneko EBn daudenekin homologagarriak izango ziren ikerketarako eta transferentzia teknologikorako euskal erakunde-egitura sortzea.
Gaur aurkeztutako egitura berriaren helburu nagusia da lankidetzako dinamikak sortzea eta masa kritikoak batzea, Euskadiko industria-erronkei erantzuteko. Xedea da sinergiari bide ematea eta tartean diren eragile guztien gaitasunak sendotzea, ikerketa-arloan nazioartean lider diren erakunde handiekin lehiatu ahal izateko (2020rako Zientzia, Teknologia eta Berrikuntza Planaren jarraibideekin bat etorriz).
BRTA partzuergoaren nazioarteko posizionamendua eta gaitasuna
Gaur egun, Euskadi dagoeneko Europar Batasunean berrikuntza handiko taldean sartzen da. Nahiz eta EAEko biztanle- eta geografia-dimentsioa testuinguru globalean oso txikia izan, BRTA aliantzaren inguruan batzen diren ikerketa-zentroen zientzia- eta teknologia-gaitasun handiak aintzat hartuta, partzuergo berria nazioarteko erreferentziazkoak diren zientzia- eta teknologia-erakundeen –besteak beste, RISE (Suedia) edo SINTEF (Norvegia)– tamainarekin parekatu daitekeen agente gisa ikusten da.
BRTA partzuergoak zenbait gaitasun koordinatzen ditu, eta 3.700 pertsona eta 300M€-ko diru-sarrerak mobilizatzen ditu, eta Euskadiko I+G jardueraren gastuaren % 22 inguru exekutatzen du. Zientzia- eta teknologia-gaitasunen tamaina nagusiak honako hauetan laburtzen dira: zientzia-arloko 1.300 argitalpen indexatuak eta urtean 100 EPO eta PCT patente.
BRTA partzuergoak garatuko dituen jarduerak
Partzuergo berriak zenbait jarduketa-eremutan lan egingo du. Alde batetik, Partzuergoko agenteen zientzia- eta teknologia-gaitasunak antolatuko ditu. Gainera, agenteen giza baliabideen garapena koordinatuko du, ikerketako langileen karrerako planetako, gako diren ikertzaileen kontrataziorako eta jardunbide egokiak identifikatu eta trukatzeko baterako jarraibideen inguruan.
Bere beste eginkizunetako bat ezagutzaren transferentziarekin zerikusia izango du: Partzuergoko agenteak merkatu berriak arakatzera eta irekitzera bultzatuko ditu eta horretan lagunduko die, euskal zientzia eta teknologia koordinatuko ditu Europako Ikerketa Eremuan eta enpresa-sektorearentzako teknologiaren transferentzia sustatu eta garatuko du. Halaber, Partzuergoaren markaren kudeaketaren inguruan koordinatuta jardutea bermatuko da, eta euskal gizartean zientzia eta teknologia sustatu eta zabalduko dira.
Ekonomia- eta finantza-jarduera dela eta, baterako jarduketa sustatuko du erakunde-egituraren kudeaketan, bai eta Partzuergoko agenteak Zientziaren eta Teknologiaren Euskal Sareko agente gisa eratzen dituzten adierazleen segimendua ere. Azkenik, Partzuergoko agenteen I+G+b jarduerarako laguntza-zerbitzua emango du, Partzuergoaren jarduketa-eremuetan eta interes komuneko beste edozein eremutan.
Gobernu-egitura eta gobernu-organoak
Gobernu-organoak Batzar Nagusi batez osatuta egongo dira, presidentetzarekin eta presidenteordetzarekin.
Kudeaketa- eta zuzendaritza-organoak Batzorde Teknikoak eta Zuzendaritza Nagusiak osatuko dituzte, eta bi aholku-organo egongo dira, Batzorde Zientifiko-Teknologikoaz eta Industria Batzordeaz osatuak.
Batzar Nagusia Partzuergoaren gobernu-organo gorena izango da, eta agente guztiak egongo dira ordezkatuta bertan. Ordezkaritza Partzuergoa finantzatzeko egindako urteko ekarpenaren proportziozkoa izango da.
Bi urteko gehieneko epean, ospe handiko adituez osatutako Nazioarteko Adituen Aholku Batzorde batez hornituko da BRTA Partzuergoa.
Rikardo Bueno Zabalo izendatu dute BRTAren zuzendari
Gaur goizean, BRTAren Batzar Orokorrak partzuergo berria zuzenduko duenaren izendapena onartu du.
Lotutako albisteak
HIMUGI proiektuak mugikortasunean eta garraioan aplikazioak dituen hidrogeno-propultsio sistema bat lortu nahi du
Euskal erakundeen arteko partaidetza eta lankidetza handia du, eta SPRIren Hazitek programaren laguntza ekonomikoa jaso du.
Ceit zentro teknologikoak 300 enplegu baino gehiago sortzen dituzten 20 spin-off sustatu ditu eta 30 M € inguruko inbertsioa ekarri dute
Mikel Jauregi sailburuak Ceit bisitatu du, ikerketa aplikatuko eta teknologia enpresara transferitzeko erreferentziazko zentro teknologikoa
Sei euskal ikerketa-erakundek bat egin dute ITTHACAn zahartze osasuntsua sustatzeko
Elkartek programak finantzatutako proiektu honek biomarkatzaileak, iragarpen-ereduak eta osasunaren zuzeneko monitorizazioa erabiltzen ditu.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
Industriarako soluzio teknologiko aurreratuen garapenean erreferentea den ULMA kooperatiba taldea bisitatu du Mikel Jauregi sailburuak
Oil&Gaseko negoziorako brida homologatuen fabrikazioan munduko liderra den ULMA Forged Solutionsen lantegi nagusian ibili da eta "ziurgabetasuna nagusi den une honetan, ULMA kooperatiba-taldea industriaren, inbertsioaren, berrikuntzaren eta kalitatezko enpleguaren aldeko apustua nabarmena egiten ari da" nabarmendu du
Connect Group, zentro teknologikoa Donostian duen multinazionala
Donostiako lantegiak SPRI Taldearen BDIH Konexio programaren laguntza jaso du, eta urtean bi milioi txartel elektroniko diseinatu eta fabrikatzen ditu
Eusko Jaurlaritzak Bikaintek programa zabaldu du enpresetan ikerlariak kontratatzea sustatzeko
2025erako planak 5,7 milioi euroko aurrekontua du eta urtean 60.000 euro bitarteko dirulaguntzak eskaintzen ditu kontratazio bakoitzarentzat
Lehendakariak I+Med laborategiko instalazio berriak bisitatu ditu, munduko lehen Nanohidrogel Adimendunen Institutu Biomedikoa
"Gure helburua da gero eta ikertzaile eta ekintzaile gehiago egoteko baldintza egokienak sortzea"
Bianditz, esku-erremintak, doitasuneko piezak eta kautxuzko injekzio-moldeak fabrikatzen dituen 60 urteko enpresa
Irunen kokatuta dagoen konpainiak, azken urtean fakturazioa % 30 handitu duenak, SPRI Taldearen zibersegurtasun-programako laguntza jaso du
“Innovation Land” lelopean, Euskadik Transfiere 2025 Europako zientzia, teknologia eta berrikuntzarako fororik handienean parte hartuko du
Euskadik presentzia nabarmena izango du programa ofizialean, Basque Research and Technology Alliance (BRTA) aliantzako, SPRI Taldeko, Tecnaliako eta ZITUko arduradunek parte hartuko baitute