Ingenersun-ek bost tona jasotzeko gai den AGV robot bat garatu du

Ingenersun enpresak, prozesu industrialen automatizazioan espezializatuta dagoenak, bost tona jasotzeko gai den AGV robot bat sortu du Zenialabs-ekin elkarlanean. Orga jasotzaile automatizatu hori modu autonomoan dabil, hots, gidaririk gabe. Kamioiak zamatzea du helburu, giza taldeak balio erantsi txikiko zeregin errepikakor eta arriskutsu horretatik libratzeko.

Ingenersun-eko Merkataritza-saileko Zuzendari Sergio Bilbaoren hitzetan, lorpena garrantzitsua izan da: “merkatuan ezaugarri horiek ez zituen ibilgailu automatizatu bat sortu da, lan askotan erabil daitekeena. Izan ere, proiektu hori AGB fabrikatzaileei proposatu genien hasiera batean, baina haiengandik ez genuen erantzun positiborik jaso”.

Ingenersun-ek lideratu du proiektua, diseinuaz eta kontzeptuaz arduratu baita. Automatismoetan eta elektronika aurreratuan espezializatutako startup teknologiko Zenialabs-ekin lankidetzan gauzatu du; izan ere, automatizazioa egitea egokitu zaio horri.

Orga jasotzaile autonomo bat da emaitza, zeinak kamioia zamatzeko zirkuitu osoa egiten duen. Hala, kaian, zama dagoen tokira abiatzen da, hura jaso eta kamioira eramaten du, barruan sartzeko. Lan horretan, ibilgailuaren jarraipena bi sistemaren bidez egiten da: orga kaitik dabilenean, filogidatu baten bidez gidatzen da, hau da, egin beharreko ibilbidea zehazten duen zinta magnetiko baten bitartez. Kamioira, zama sartzeko, iritsi ondoren, Lidar-ek gidatzen du, hots, laser argiaren bidez xede-azalerarekiko distantzia neurtzen duen mapatze-teknologia baten bitartez.

AGV robot horren konplexutasuna automatizazioan ez ezik, kamioian zama sartzeko doitasunean ere datza, kamioiaren bi aldeen artean lasaiera oso estua utzi behar baita, 5 eta 8 zentimetro artekoa alde bakoitzean. “Zama kamioi barrura eramaten den bitartean, hamabi metroko luzeran zehar, une oro distantzia hori uzteko doitasun eta eskakizun itzelak behar dira, oso zaila baita hori lortzea”, adierazi du Sergio Bilbaok.

Orga jasotzaile automatizatuak elementu guztiak ditu instalatzen den lantegiko lanetan integratzeko eta, une oro, denbora errealean, egiten duen jarduera Ingenersun-en linea robotizatuarekin (salgaia zamatzeko prest jartzeaz arduratzen dena) komunikazioa mantentzeko. AGV ibilgailuak ibiltzen duen ibilbideak dagokion segurtasun-instalazioa du, itxitura eta wifi  bidez komunikatzen diren larrialdiko botoiak jartzen baitira.

Robota garatzeko 6 hilabetez lan egin dute bi taldetako 4 langilek. Orain lantegiko probaldia egiten ari da, sistema guztiaren funtzionamendua biribiltzeko, laster ibilgailu automatizatua proiektu berritzaile batean erabiltzeko helburuarekin.

Ingenersun robotika-esparruan garatzen ari den lanaren erakusgarria da proiektu hori; izan ere, enpresak esparru horretan erabiltzeko prest dauden soluzioak ematen ditu, behar jakinen arabera. Hala, proiektuak pertsonalizatzeko duen gaitasuna eta automatizazio-teknologiak integratzen dituen enpresa gisa duen prestakuntza, hainbat sektoretan, hala nola, automobilgintzan, aeronautikan edo kautxuaren industrian pixkanaka hazten joateko gakoak dira.