Orai, urtebeteko bidea eginda, indartsu eta asmo handiz etorkizunerantz
Duela urtebete sortu zen Orai adimen artifizialeko langunea, industria eta enpresak lehiakorragoak izan daitezen laguntzeko. Lengoaia naturalaren prozesamenduko (NLP) goi-mailako ikerketan eta soluzio teknologiko adimendunetan espezializatutako langunea da Orai, eta goi-mailako ikerketa eta soluzio teknologiko adimendunak eskaintzen dizkie enpresa eta erakundeei. Adimen artifizialaren eremuan Elhuyar Fundazioak egindako apustu estrategikoa izan zen Orai, eta apustuaren sendotasuna agerian geratu da lehen urteko ibilbide oparo honetan.
Teknologiaren transferentzia areagotzen eta negozio-aukerak sortzen
Euskal Herriko ekosistema industrialarekin eta administrazio publikoekin eskuz esku lan egiten jarraitzen du Oraik. Hainbat alderdi aipatu ditu Oraiko koordinatzaile Josu Aztiriak: «Proiektu garrantzitsuak ditugu, eta gure teknologiarekin sortutako plataformak eta merkaturatze-bideak ere areagotu ditugu. Administrazio publikoan zenbait lizitazio irabazi ditugu bilatzaile aurreratuen eta QA edo galdera-erantzun bidezko sistema aurreratuen arloan». Fabrikazio industrialaren esparruari dagokionez, COGiLE proiektua amaitu berri dute: «NLP alorra gidatu dugu proiektuan; elkarrizketa-laguntzaileak, testu-meatzaritza eta hizketa-teknologiak jarri ditugu fabrikazio adimendunaren zerbitzura».
Orairen teknologiarekin sortutako Elia eta Aditu plataforma arrakastatsuez gain, ahots pertsonalizatuak sortu eta garatzeko zerbitzu-ildo berri bat ireki du Elhuyarrek, Orairen lankidetzarekin. Aztiriak azpimarratzen duenez, «puntako ikerketa egiten, industria-ekosistemara transferitzen eta, era berean, negozio-ildo berriak irekitzen laguntzen ari da Orai».
Lehen mailako agente teknologiko gisa urrats sendoak ematen
Ikerketa-proiektu estrategikoak gidatzen ari da Orai adimen artifizial sortzailean eta hizkuntza-eredu erraldoien ildoan, «konputazio eta datu-multzo txikiagoekin kalitate goreneko teknologiak sortzeko», azaldu du Oraiko koordinatzaileak. Izan ere, hizkuntza guztiek ez dituzte, adibidez, ingelesak dituen baliabide oparoak halako teknologiak sortzeko. «Eremu horretan, esaterako, bi artikulu zientifiko aurkeztuko ditugu aurki adimen artifizialaren eta NLPren arloan mundu mailan garrantzitsuena den ACL kongresuan».
Bestalde, «Creative Europe deialdiaren diru-hornidurari esker, bikoizketa automatikorako plataforma adimendun bat garatzen ari gara, MultilngTool, ikus-entzunezko edukiak automatikoki azpititulatu, itzuli eta bikoizteko gaztelaniaz, frantsesez, ingelesez, euskaraz, katalanez eta galegoz, ikasketa automatikoa eta ikasketa sakoneko azken estrategiak eta teknikak erabiliz», dio Aztiriak. Espainia osoan berrikuntza teknologikoen esparruan 2022an diru-laguntza lortu duen proiektu bakarra izan da.
Guztiontzako eta gizartearen onurarako teknologia ekoizten
Adimen artifizialaren aroan gertatu daitezkeen alborapenak zuzentzen saiatzen da Orai; «teknologia etikoak eta sozialki arduratsuak ekoizten ditugu, guztiontzako adimen artifiziala sortzeko, inor baztertuko ez duena eta gizarte inklusiboagoa egiten lagunduko duena». Horren adibide gisa aipatu ditu, batetik, genero-alborapena saihesteko Oraiko ikertzaileek itzulpen automatikoan egindako ekarpen zientifiko-teknologiko berriak; bestetik, «Euskal Herriko hezkuntza-erakunde nagusiekin lankidetzan, desgaitasuna duten haurrei laguntzeko sortzen ari garen hizketa-ezagutzailea, eta, azkenik, baliabide urriko hizkuntzak teknologikoki garatzeko Linguatec europar proiektua berritzeko ematen ari garen urratsak».
Konfiantzako aliatu teknologikoa
Hizkuntza-eredu neuronal erraldoiek eta adimen artifizial sortzaileak jokalekua aldatu dute azken hilabeteetan, «baina Oraik indartsu eta asmo handiz heldu dio olatu berri horri», dio Aztiriak. NLP alorrean espezializatuta egoteak, urte askotako eskarmentua izateak eta aldaketa teknologikoei adi egoteak «aukera ematen digu ikerketa-ildo berriak sortu eta soluzio teknologikoak berritzeko. Inpaktu ekonomiko eta disrupzio handiko garaiak espero dira; baina, era berean, aukera handiak irekitzen dira, eta enpresa eta erakundeei jauzi horretan laguntzeko konfiantzako aliatu teknologiko bilakatu da Orai. Aukeren analisi errealistetan, bideragarritasun ekonomiko eta teknikoen zorroztasunean, garapen- eta inplementazio-faseetako eraginkortasunean, eta konfiantzan eta gertutasunean oinarritutako harremanak dira gure ardatza». Bide horretan, NLP teknologiak eta AA sortzaileko proiektuak inplementatzeko aholkularitza teknologikoa eskaintzen hasiko da Orai.
Lotutako albisteak
“Innovation Land” lelopean, Euskadik Transfiere 2025 Europako zientzia, teknologia eta berrikuntzarako fororik handienean parte hartuko du
Euskadik presentzia nabarmena izango du programa ofizialean, Basque Research and Technology Alliance (BRTA) aliantzako, SPRI Taldeko, Tecnaliako eta ZITUko arduradunek parte hartuko baitute
TH Company, munduko liderra arrantza sektorerako makinetan Mungiatik
Mundu osoko 500 atunketari baino gehiagok dute enpresa horren teknologia eta % 75eko merkatu-kuota du.
Infinite proiektuak kontakturik gabe monitorizatzen du egitura aeronautikoen bizi-zikloa
Ideko zentro teknologikoak gidatutako proiektu europar honek mikrohariak erabiltzen ditu karbono-zuntzen egituren egoera kontrolatzeko, haien kalitatea ziurtatzeko, piezak sentsore kableatuekin hornitu beharrik gabe.
Vaillant Groupek aire-ur bero bonba berri bat merkaturatu du, eraginkorragoa eta zarata-mailak murrizten dituena
Behin Split proiektua amaituta, Europako merkatuan makinak merkaturatzen hasi da, eta 30.000 salmenta izatea aurreikusten du. SPRI Taldearen Hazitek Laguntza Programaren babesa jaso du.
Imanol Pradales Lehendakariak etorkizuneko abiazioa bultzatuko duen ITP Aero zentro berria inauguratu du
Imanol Pradales Lehendakariak eta Pedro Sánchez presidenteak ITP Aeroren ADMIRE zentroa inauguratu dute gaur goizean Zamudion, 24 milioi euroko inbertsioarekin eta 150 enplegu kualifikatu baino gehiagorekin. Zentro horrek berrikuntza eta jasangarritasuna sustatuko ditu hegazkingintzan Euskadin