Tapiak Alemanian bisitatutako multinazionalek Euskadiren aldeko apustua berretsi dute
- Enpresa-misioan gainera digitalizazioan, hidrogenoan eta robotikan punta-puntako zentroak bisitatzeko aukera izan du euskal ordezkaritzak.
- Tapia: “Euskadin oso adi egon beharko dugu Alemaniako ekonomiaren eta industria-jardueraren bilakaerarekin, horrek euskal ekonomian izango duen eragina saihestezina izango baita”.
Arantxa Tapia Eusko Jaurlaritzako Ekonomiaren Garapen, Jasangarritasun eta Ingurumeneko sailburuak amaitu du Alemanian astelehenetik ostiralera egin duen enpresa-misioa. Bertan, Euskadin ekoizpen-plantak dituzten multinazional nagusietako zuzendariekin bilerak egin ditu eta egoitza nagusiak bisitatu ditu. Zehazki, TRUMPF (Ditzingen), SIEMENS ENERGY eta BAYER (Berlin) taldeetako ordezkariekin biltzeko aukera izan du, baita GRUPO MERCEDES (Stuttgart) taldearen egoitza nagusian izandako topaketarekin ere, Iñigo Urkullu lehendakaria bertan zela.
Bisitatutako multinazionalen ordezkari guztiek beren euskal partnerekin gaur egun dituzten enpresa-harremanei eusteko interesa adierazi dute, hau da, Trumpfek Arabako Lantekekin, Siemens Energyk Siemens Gamesarekin (Zamudion du egoitza Siemens Gamesak) eta Bayer enpresak Donostiako Viralgenekin. Mercedes Benz Taldeak ere Gasteizko ekoizpen lantegiaren aldeko apustua sendotu egin du
Euskadin erreferentzia berezia duten sektoreetan aritzen diren lau enpresek (makina-erreminta, energia, automobilgintza eta biozientziak) berretsi egin dute beraz Euskadiren aldeko apustua, euskal ekosistema berritzailea eta gaitasun teknologiko eta industrialak nabarmenduz.
Hidrogenoa, digitalizazioa eta robotika
Sailburuak, Mikel Amundarain Industriako sailburuordearekin eta Ainhoa Ondarzabal SPRI Taldeko Basque Trade and Investment-eko kontseilari delegatuarekin batera, DLR Lampoldshausen Institutua – Espazio Propultsioko Institutua eta hidrogenoaren ekoizpenean ikerketa aurreratuko zentroa – ezagutzeko aukera izan du, baita FESTO enpresa ere, ia 100 urteko historia duen familia-enpresa independentea. FESTO automatizazio eta prestakuntza teknikoko tekniken mundu mailako fabrikatzaile liderra da, ekoizpen adimendunera bideratuta, adimen artifizialaren eta ikaskuntza automatikoaren aldeko apustuaren bidez. Festok Aplikazio Zentro bat du (Festo Experience Center) AICn, Boroan, eta euskal enpresa nabarmenekin lankidetza ildoak ditu.
Misioa astelehenean hasi zen Munichen, Bavarian bizi den euskal talentuari buruzko jardunaldi batekin. Euskal ordezkaritzak Municheko Unibertsitate Teknikoa (TUM) bisitatu zuen, Kepa Iturralde donostiar eta doktorearen Eraikuntza eta Robotika Katedra (BR2) ezagutzeko.
Talentua
Ondoren, Eusko Jaurlaritzako ordezkariek networking-topaketa batean parte hartu zuten Bavarian bizi diren hogeita hamar bat profesional euskaldunekin. Horien artean, Airbus, BMW, Maier, Orona, Fagor Ederlan, Arteche, Amazon eta Schaeffler enpresetako ingeniariak eta hezkuntza eta osasun sektoreetako profesionalak.
Alemaniako testuinguru ekonomikoa eta Euskadirekin duen harremana
Arantxa Tapia sailburuak egin duen bidaia Alemanian zalantza eta kezka handiko unean egokitu da; izan ere, aste honetan bertan, Alemaniako kantziler federala, Olaf Scholz, herrialdeari zuzendu zaio, datorren neguan Alemaniak izan ditzakeen energia-mugei aurre egiteko neurriak hartzeko beharraz ohartarazteko. Ukrainaren inbasioak, segurtasun energetikoak eta inflazioak ziurgabetasun kezkagarria sortu dute arduradun politiko eta enpresarialen artean.
Alemania Europako ekonomiaren motore garrantzitsuenetakoa da, eta harreman komertzial handia du Euskadirekin; gainera, Eusko Jaurlaritzaren 2021-2024rako nazioartekotze-estrategiaren lehentasunezko herrialdeetako bat da. Horregatik, Tapia sailburuak adierazi du Euskadin oso adi egon beharko dugula alemaniako ekonomiaren eta industria-jardueraren bilakaerarekin, horrek euskal ekonomian izango duen eragina saihestezina izango delako.
Ziurgabetasunez betetako nazioarteko testuinguruan bagaude ere, kontsultatutako Alemaniako enpresa handiek hazkunde-aurreikuspenei eusten diete eta Euskadiko ekoizpen-planten aldeko apustua egiten dute.
TEKNIA euskal enpresak Stuttgarteko Forschner PTM GmbH alemaniarra erosi duela iragarri du
Sailburuak gogorarazi du Euskadi-Alemania lankidetza norabide bikoitzeko harremanean oinarrituta dagoela. Gaur, Elorrion egoitza duen TEKNIA talde multinazionalak Stuttgartetik gertu dagoen Forschner PTM GmbH konpainia alemaniarra erosi duela iragarri du. 100 langile dituen enpresa da, eta Tekniak 22 ekoizpen-instalazio izango ditu mundu osoan. Egoitza Baden-Wutenbergen duen eta aurrerantzean Teknia Stuttgart izena izango duen enpresa gama altuko osagaietarako barra mekanizatzen espezializatuta dago, eta instalazio horrek garrantzi berezia izango du etorkizuneko ibilgailu autonomoetan.
Lotutako albisteak

“Innovation Land” lelopean, Euskadik Transfiere 2025 Europako zientzia, teknologia eta berrikuntzarako fororik handienean parte hartuko du
Euskadik presentzia nabarmena izango du programa ofizialean, Basque Research and Technology Alliance (BRTA) aliantzako, SPRI Taldeko, Tecnaliako eta ZITUko arduradunek parte hartuko baitute

TH Company, munduko liderra arrantza sektorerako makinetan Mungiatik
Mundu osoko 500 atunketari baino gehiagok dute enpresa horren teknologia eta % 75eko merkatu-kuota du.

Infinite proiektuak kontakturik gabe monitorizatzen du egitura aeronautikoen bizi-zikloa
Ideko zentro teknologikoak gidatutako proiektu europar honek mikrohariak erabiltzen ditu karbono-zuntzen egituren egoera kontrolatzeko, haien kalitatea ziurtatzeko, piezak sentsore kableatuekin hornitu beharrik gabe.

Vaillant Groupek aire-ur bero bonba berri bat merkaturatu du, eraginkorragoa eta zarata-mailak murrizten dituena
Behin Split proiektua amaituta, Europako merkatuan makinak merkaturatzen hasi da, eta 30.000 salmenta izatea aurreikusten du. SPRI Taldearen Hazitek Laguntza Programaren babesa jaso du.

Imanol Pradales Lehendakariak etorkizuneko abiazioa bultzatuko duen ITP Aero zentro berria inauguratu du
Imanol Pradales Lehendakariak eta Pedro Sánchez presidenteak ITP Aeroren ADMIRE zentroa inauguratu dute gaur goizean Zamudion, 24 milioi euroko inbertsioarekin eta 150 enplegu kualifikatu baino gehiagorekin. Zentro horrek berrikuntza eta jasangarritasuna sustatuko ditu hegazkingintzan Euskadin