ZB Group, birziklapen prozesuko lehen mailan

Gipuzkoako enpresak hondakin solidoak birrintzeko eta birziklatzeko makinen fabrikazioan jarduten du, mundu osoan zehar banatutako bezeroekin eta berrikuntzaren aldeko apustu argiarekin.

ZB Group 70eko hamarkadan Errenterian (Gipuzkoa) sortu zen enpresa talde bat da. Gaur egun, egoitza nagusia herri berean izanik, hondakin solidoak birrintzeko eta birziklatzeko makinak diseinatzen eta fabrikatzen ditu. “Material horiek birziklatu ahal izateko lehen urratsa ematen dugu”, adierazi du Aitor Mozok, ZB Groupeko proiektuen arduradunak. Gainera, taldeak meatzaritzan aritzen den beste enpresa bat du, Andaluzian presentzia handia duena eta 10 instalazio inguru dituena. Guztira, 125 langile inguruk osatzen dute taldea.

Enpresak mota guztietako hondakinetarako makinak egiten ditu: txatar ferrikoak, burdinazkoak ez diren txatarrak, material idorrak edo eraikuntza- eta eraispen-hondakinak. Gainera, bezeroei bi motatako instalazioak eskaintzen dizkie, mugikorrak edo finkoak. “Lana bezeroarekin batera egiten dugu, gure proiektu guztiak neurrira eginda daude. Beti saiatzen gara berrikuntza nabarmena duten soluzioak eskaintzen”, azaltzen du Aitor Mozok.

Berrikuntza da ZB Groupen oinarrietako bat, eta horrek Europako merkatuan enpresa liderra izatea eragin du. THOR izeneko ekipoen garapen berritzailea izan da egoera horren gakoa. Era guztietako materialak zatikatzen, garbitzen, sailkatzen eta balorizatzen dituzten instalazioak dira, desegite-ibilgailuak barne, diru-itzulera azkarra bermatuz eta ingurumen-inpaktu minimoa bermatuz taldearen beste oinarrietako bat. Garapen berritzaile horretan aurrera egiteko, ZB Groupek SPRI Taldearen laguntza jaso du Hazitek programaren bidez.

Errenterian duen egoitza nagusiaz gain, ZB Groupek bi langile ditu Atlantan, Estatu Batuetan. Herrialde honetan ekipoen eskari handia dela eta, egoitza honen helburua bezeroarengandik gertuago egotea eta saldu osteko zerbitzu hobea eskaintzea da. Etorkizunari begira, enpresak bere garapen berritzailea jarraitu nahi du, bere jarduera are gehiago dibertsifikatzeko eta merkatu berritan presentzia lortzeko.

SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu.