Ategi, erosketa-zentral bat baino askoz gehiago
Ategi, Mondragon Korporazioan integratua, etengabeko berrikuntzaren adibide da. Duela 20 urte sortu zen erosketa-zentral bezala, baina orain erosketen kudeaketarako konponbide integral bat eskaintzen die enpresei, eta zerbitzu aski espezializatuak ditu, esaterako, lehengaien erosketarako kudeaketa prediktiboa. Konpainia horrek SPRI Taldearen zibersegurtasun industrialerako programaren laguntza jaso du.
“Enpresa 2001ean sortu zen, eta 15 kooperatibaren erosketa-premiak batu zituen; gure izaera kooperatiboari esker, badaukagu erosketetan sinergiak aprobetxatzeko behar den gaitasuna. Harrezkero, elkarren arteko lankidetza izan da gure garapenaren giltza; enpresen arteko kolaborazioari esker, konpainia bakoitzak indibidualki izango lituzkeenak baino baliabide hobeak lortzen ditu, erronka estrategiko berriak gainditzeko behar duena eskuratzen du eta bere independentzia mantentzen du” azaldu du Oier Larrañagak, horniduren erosketa arloko arduradunak.
Ategi erosketa-prozesuan espezializatutako zerbitzu enpresa bat da. Bere jarduera MONDRAGON Taldeko 15 kooperatibarekin hasi zuen arren, une honetan 300dik gora enpresa biltzen ditu. Enpresa horiek arazo eta estrategia oso desberdinak dituzte, baina denek behar dituzte erosketen kudeaketako zerbitzu espezializatuak.
Eboluzioa izugarria izan da. Hasieran, enpresak bulegoko materiala bakarrik erosten zuen, baina orain bost eremu kudeatzen ditu: energia-erosketa, batik bat argindarra eta gasa; garraio eta logistika zerbitzuak (lurrekoa, airekoa, itsasokoa, presazkoak); komunikazio-teknologiak eta informatika (eramangarriak, lizentziak, euskarri teknikoa); askotariko hornidurak (bulegoko materiala, burdindegia, norbere babeserako ekipoak edo lanerako arropak); eta nazioarteko erosketak.
“Azken hori da arlo berriena. Babesa ematen dugu atzerrian erosketak egiteko eta geuk kudeatzen ditugu erosketa horiek, batez ere kostu baxuko herrialdeetan eta bereziki Asian. Horretarako, ekipo propio bat daukagu, hornitzaileen bilaketaz eta eskaeren kontrol eta jarraipenaz arduratzen dena. Babesa ematen dugu erosketak egiten diren tokian, eta bertako langileekin. Mondragon Korporazioak atzerrian zeukan sail bat zen”.
Hala, Ategik bulegoak ditu Txina, Vietnam eta Indian, eta lankidetza-akordioak Mexiko eta Estatu Batuekin. Negoziazioa modu bateratuan egiten da arlo guztietan, salbu eta nazioarteko erosketetan, kasu horretan “gehiago baita bezeroaren neurrira eginiko traje baten modukoa”.
Enpresen arteko lankidetza
Eskaintzen duten zerbitzuaren ezaugarrietako bat da bezerotzat dituzten enpresen arteko lankidetza, eta baita ere hornitzaileekiko harreman iraunkorrak izatea. “Bi alderdiek irabazi behar dute. Gure asmoa ez da bezeroaren izenean erosi eta gero desagertu. Rol aktiboagoa hartzen dugu eta lankidetza sustatzen dugu ez soilik erosketa bateratuak egiteko orduan, baizik eta orobat jarduera kooperatiboa bultzatzean”.
Hala, lehengaien merkatuak monitorizatu eta haien jarraipena egiteko zerbitzu bat garatu dute. “Algoritmo bati esker, merkatuaren etorkizuna aurreikusten dugu. Enpresek milioika euroko inbertsioak egiten dituzte lehengaietan, eta gure zerbitzuak segurtasuna ematen die bezeroei, paper gainean jartzen baitiegu merkatuak hartuko duen norabidea. Egunero lantzen dugu informazio hori”.
Eskaintzen duten beste zerbitzu bat “Arrisku” da, zeinaren bidez hornitzaileen finantza arloko zaintza egiten baita. “Informazio publikoa eskaintzen duen beste plataforma bat da, zeinetan hornitzaile bakoitzaren egoera finantzarioa baloratzen baita”.
Ategik mota askotako bezeroak ditu, 40-50 sektore ingurutakoak: automozioa, igogailuak, makina-erreminta, ekipamendu orokorra, banka, etab.
Iaz 4,3 milioi euroko fakturazioa izan zuen, eta gaur egun 22 pertsona ditu plantillan, 13 gizon eta 9 emakume. I+G-n egiten duen urteko inbertsioa milioi erdi euro baino gehiagokoa da, bere negozioaren % 12koa, hain zuzen.
SPRI Taldearen zibersegurtasun industrialerako programaren laguntzari esker diagnostiko bat egin da; gainera, “azpiegitura teknologikoa eta lan egiteko modua aldatu dira, segurtasun gehiago izateko datuetan, eta aplikazio korporatiboetarako sarbidea aztertu da. Proiektua bukatuta dago, eta inbertsio bat egin dugu azpiegituretan” dio Ibai Iregik, IT eremuko erosketetako teknikariak.
Enpresak hiru erronka nagusi ditu. Lehena da bezeroen hornikuntza-katea antolatzea eta arriskuak minimizatzea. “Enpresek arazo handiak dituzte energiarekin, garraioarekin, lehengaiekin… Gure asmoa da arriskuaren kudeaketa hobetzea digitalizazioaren bitartez, eta bide horretatik, lehiakortasuna eta efizientzia hobetzea. Erosketetako sailak ez daude oso digitalizatuta, eta hori hobetzeko proiektu bat landu dugu hainbat enpresarekin” dio Oier Larrañagak.
Bigarren erronka logistika arlokoa da; lehenik eta behin, barne-prozesuak digitalizatu behar dira, “eta gero digitalizazio hori bezeroengana eraman, eskura izan ditzaten hornitzaileekin zuzeneko harremana izateko eta erosi dituzten gaiak uneoro non dauden jakiteko behar dituzten tresnak”. Azkenik, hirugarren erronka da “lankidetza sendotzen jarraitzea eta ezagutza partekatzea”.
Lotutako albisteak
Diker, osasungintzaren sektorerako injekzio bidezko plastikoetan Euskadi mailako erreferente bihurtu nahi duen ETEa
Oiartzungo enpresa, gaur egun, batez ere automobilgintzaren eta elektronikaren sektorearentzat ari da lanean
Talleres Altube, doitasuna nortasunean daraman Gipuzkoako mekanizazio-enpresa
Bergarako konpainiak SPRI Taldearen zibersegurtasun-programako laguntza bat jaso du, eta negozioa % 50 handitzea espero du 2027rako
Fecin, industriako eskuilagintzan espezializatuta 60 urte daramatzan Gipuzkoako ETEa
Deban kokatuta dagoen enpresa da Europa mailan sektore honetako bost fabrikatzaileetako bat eta SPRI Taldearen zibersegurtasun-programaren laguntza jaso du
ENSen kalifikazio gorena lortu du Izertisek, eta administrazio publikoen eta enpresen bazkide estrategiko gisa zuen posizioa indartu du
Informazioa kudeatzen duten sistema, aplikazio eta zerbitzuetan duen maila ezin hobea ziurtatu du aholkularitzak; Gasteizen du egoitza
Orbik Cybersecurity, Mondragon eta Ikerlanen arteko hitzarmen bati esker Eusko Jaurlaritzaren laguntzarekin kooperatiba bihurtu den lehen star-tup-a teknologikoa
Akordioak 10 milioi euro baino gehiago mobilizatuko ditu datozen lau urteetan, oinarri teknologikoko kooperatibak sortzeko