BCSCk Nurenbergen aurkeztu du zibersegurtasun arloko enpresetan inbertitzeko Europako funts publiko-pribatuaren ernamuina
Bideragarritasun-azterketa bat egitea izango da Europaren zibersegurtasun arloko gaitasunak eta autonomia handitzeko ekimen anbiziotsu honen lehen urratsa.
ECSOko beste ordezkari garrantzitsu batzuekin batera eginiko mahai-inguru batean, BCSCko zuzendari Javier Diéguezek nabarmendu du ekimen hau oso garrantzitsua dela Europa lehiakorrago egiteko.
Nurenbergeko IT-sa azoka, Europako zibersegurtasun arloko topaketa garrantzitsuenetako bat, eszenatoki paregabea izan da Basque CyberSecurity Centre (BCSC) egiten ari den bideragarritasun-azterketa ezagutarazteko. Azterketa horrek ikertzen du nola diseinatu eta sortu Zibersegurtasun arloko Europako Inbertsio Plataforma (ECIP), zeina lehen urratsa izango baita zibersegurtasunaren sektore estrategikoa indartuko duen Europako funts publiko-pribatu anbiziotsu bat sortzeko.
BCSCko zuzendari Francisco Javier Diéguez Barriocanalek azokako mahai-inguru batean parte hartu zuen ECSOko (Zibersegurtasun arloko Europako Erakundea) beste ordezkari garrantzitsu batzuekin batera, eta aukera baliatu zuen ekimenak izango duen irismena azpimarratzeko. Bere esanetan, proiektu honek zibersegurtasunaren abangoardian kokatuko du enpresen euskal ekosistema, eta baliagarri izango da munduko beste ekonomia batzuekiko dugun menpekotasuna murrizteko. Javierrek, gainerako adituekin batera, esan zuen sektore hau oso konplexua dela eta oso zatikatuta dagoela gure eskualdeetan, baina jarraian oinarrizko bi faktore nabarmendu zituen Europaren lehiakortasun-maila globala handitzeko: lankidetza publiko-pribatuaren garrantzia eta gure enpresa-ekosistemak zibersegurtasun arloan duen potentziala.
Zibersegurtasun arloko Europako Inbertsio Plataforma (ECIP) bat sortzeko bideragarritasun-azterketa ECSOren ekimen baten parte da, eta Europako Batzordearen nahiz Europako zibersegurtasun arloko berrogeita hamar bat enpresa handi eta erakunderen babesa du. Ekimen honen oinarrizko helburua da inbertsioak sustatu eta erakartzea Europako zibersegurtasun arloko enpresa gorakorretarantz eta ETEetarantz, Europan bertan garatu ditzaten bai gaitasunak eta bai konponbide estrategikoak.
BCSCk bideragarritasun-azterketa egitea lehen urratsa izan da proiektu estrategiko hori martxan jartzeko bidean, eta berriro utzi du agerian Euskadi protagonista eta erreferente bilakatu dela Europako eskualdeen artean merkatu hau garatzeko orduan, merkatu bat zeinetan berriro errebindikatu diren gure gaitasunak eta konpetentziak arlo teknologikoan.
Protagonismo hori presente egon zen mahai-inguru osoan zehar, eta Javierrekin batera aritu ziren ECSOko beste hainbat ordezkari garrantzitsu, hala nola Axel Deininger, Secunet Security Networks AG enpresako CEO eta presidentea; Martin Kreuzer, Clavister enpresako zuzendaritza batzordeko kidea; Thomas Riechmann, Atos enpresako zibersegurtasun zerbitzuen operazioetako presidenteordea; eta Luigi Rebuffi, Europako Segurtasun Zibernetikoaren Erakundeko (ECSO) idazkari nagusia, moderatzaile lanetan aritu zena.
Osasun krisiaren osteko BCSCren lehen nazioarteko bisita hau baliagarria izan da, orobat, zibersegurtasuna Europan hartzen ari den paper garrantzitsuari buruzko iritziak partekatzeko beste pertsonaia ezagun batzuekin, hala nola Daniel Lindener eta Monika Marr (Basque Trade & Investment), Maria Angelica Vargas (Howard konderriko Ekonomi Garapen Agintaritzako arduraduna), Sandra Wiesbeck (Baviera IT-Sicherheitscluster e. V. klusterreko kidea), Christine Skropke eta Axel Deininger (Secunet Security Networks AG), Carlos Moreira da Silva, Carlos Alberto Silva eta Margarida Correia (Sonae IM Investment Management), eta Holger Mühlbauer doktorea eta Franziska J. Bock (IT Security Association Germany – TeleTrust).
Basque CyberSecurity Centre-n bidez proiektu anbiziotsu honetan parte hartuz, Euskadi adierazgarri bihurtzen ari da ikusteko nolako paper garrantzitsua jokatzen duten Europako eskualdeek merkatuen garapenerako eta nazioarteko lankidetza publiko-pribatua bultzatzeko horrelako ekimen estrategikoetan. Paper hori, bestalde, aukera paregabea da Europak zibersegurtasun arloan daukan talentua aldarrikatzeko eta bere gaitasunak hobetzeko.
Lotutako albisteak
Adimen artifiziala, blockchaina eta zibersegurtasuna izango dira Elkargiko 35. Enpresa Topaketaren erdigunean
Ekitaldia apirilaren 10ean izango da Donostiako Kursaal Jauregian
SOC-Ek bere kokapen zientifiko-teknologikoa sendotu nahi du esparru aeroespazialean
Bizkaiko konpainiak Etherneten oinarritutako komunikazio-soluzioak eskaintzen dizkie Airbus, Boeing, Lockheed Martin edo Blue Origin bezalako bezeroei, eta sektore horretara bideratutako Time-Sensitive Networking (TSN) komunikazio ziberseguruetarako I+G proiektu handi batean murgilduta dago.
Cybertixek Zerolynx integratu du eta ETE-entzako zibersegurtasuneko hornitzaile erreferente gisa finkatu da
Operazio horrek zibersegurtasuneko portfolioa indartu du zerbitzu espezializatuetako bertikal berriekin, hala nola Offensive Security edo Forensicsekin
ENSen kalifikazio gorena lortu du Izertisek, eta administrazio publikoen eta enpresen bazkide estrategiko gisa zuen posizioa indartu du
Informazioa kudeatzen duten sistema, aplikazio eta zerbitzuetan duen maila ezin hobea ziurtatu du aholkularitzak; Gasteizen du egoitza
Orbik Cybersecurity, Mondragon eta Ikerlanen arteko hitzarmen bati esker Eusko Jaurlaritzaren laguntzarekin kooperatiba bihurtu den lehen star-tup-a teknologikoa
Akordioak 10 milioi euro baino gehiago mobilizatuko ditu datozen lau urteetan, oinarri teknologikoko kooperatibak sortzeko