Jegan, langileen jabetzakoa den eta automobilgintzarako segurtasun handiko piezak fabrikatzen dituen ETEa
Jegan Itziarren (Gipuzkoa) kokatutako enpresa bat da, 64 langile ditu, horietatik 40 bazkideak eta kudeatzaileak, eta bere negozio nagusia da automobilgintzarako segurtasun handiko piezak fabrikatzea. Nazioartean oso zabalduta dagoen enpresa honek gainerako enpresa gehienek nahi dutenaren kontrakoa nahi du, alegia, gehiago haztea Estatuan. Konpainiak SPRI Taldearen zibersegurtasun industrialeko programaren laguntza bat jaso du. Duela hiru urtetik, SPRIk Basque Cybersecurity Centre (BCSC) zentroaren laguntza du zibersegurtasunaren euskal ekosistema bultzatzeko eta, ondorioz, baita ere laguntza ekonomikoak banatzen dituen programa honetarako.
Enpresa hau 1972an sortu zen Mutrikun (Gipuzkoa) Juan Egaña izenarekin. Garai hartan publizitateko artikuluak fabrikatzen zituen, esaterako, giltzatakoak edo pinak. 1991n lurra jo ondoren, langileek hartu zuten konpainiaren ardura; izen berri bat (Jegan SAL) eman zioten eta jarduera berri bat (automobilgintza sektorerako piezen fabrikazioa) garatzen hasi ziren.
“Hasieran Eibarren geunden, eta 1995ean Itziarrera joan ginen leku gehiago behar genuelako. Eibarko lantegiarekin jarraitzen dugu, izan ere, hantxe utzi ditugu bainu elektrolitikoak, eta Itziarren, berriz, galdaketa-lanak egiten ditugu” azaldu dute Gorka Aizpitarte zuzendari nagusiak, Elisa Azkarate finantzetako zuzendariak, Kepa Ibarzabal lantegiko zuzendariak eta Koldo Sánchez IT arloko zuzendariak.
Jegan-ek hazten jarraitu du, azken bi hamarkadetan bi zabalkuntza eginaz bere instalazioetan, eta beste sektore batzuetan ere sartuz.
Bete-beteko zerbitzua
Konpainiak bete-beteko zerbitzua eskaintzen die bere bezeroei. “Bezeroek pieza esklusiboak egiteko planoak ekartzen dizkigute. Egingarritasun azterketa bat egiten dugu ematen diguten dokumentazioarekin, eta ingurune bat sortzen dugu lankidetza estuan arituz bezeroarekin. Bezeroak oniritzia ematen digunean, prest gaude abiarazi eta produkzioari ekiteko”. Erabiltzaileak ikusten ez dituen piezak fabrikatzen dituzte, esaterako segurtasun aktibo nahiz pasiboko elementuen (hasi segurtasun-uhaletik eta ADAS kameretara) osagaiak. Segurtasun handiko piezak dira. Beren bezeroak batez ere automobilgintzako talde handiak dira, fakturazio osoaren % 65 hartzen baitute.
Plantilla 64 pertsonak osatzen dute, horietatik 40 bazkideak –“inork ez dauka akzioen % 5 baino gehiago”-, eta aurten 14 milioi eurotik gorako fakturazioa izango dute. I+G funtsezkoa da Jegan-entzat, eta presente dago “iristen zaigun edozein proiektutan; I+G taldeak buru-belarri egiten du lan proiektu hori aurrera ateratzeko ahalik eta kosturik txikienean. Bezeroek aintzat hartzen dituzte gure zerbitzua eta gurekin harremantzeko erraztasuna (enpresa txikia garelako), baina baita ere gure kostua eta uzten dugun karbono aztarna. Iristen zaizkigun proiektu guztiak I+G-ko proiektuak dira”. Lehiakidetzat dituzte Suediako edo Alemaniako multinazionalak, “euren lantegiak Txinan edo Mexikon dituztenak eta urtean 100 milioi euro baino gehiago fakturatzen dutenak”.
Euskal enpresa askoren helburua da nazioartekotzearen bidez haztea, baina Jegan-ek guztiz kontrakoa du helburu: Espainian dituen salmentak handitzea. “Ez da logikoa gure bezeroen % 90 atzerrikoak izatea. Estatuko merkatuan hazteko ildo hori lantzen ari gara sektore eta produktu desberdinak bilatuz”.
SPRI Taldearen zibersegurtasun industrialeko programaren laguntzarekin sarea segmentatu eta segurtatu dute, datuen trafikoa kontrolatzeko eta euren sareetara sartzeko baimen bereiziak ezartzeko (hain zuzen, horixe da 4.0 Industriaren arazoetako bat). “Automobilgintzan etengabe ikuskatzen gaituzte, eta oso kontuan hartzen dute etorkizunak dakarkigun guztia, esaterako, partekatzen den informazioa. Eta are gehiago gure kasuan, segurtasun handiko piezekin lan egiten dugu eta”. SPRIk bultzatu duen proiektua garatuta eta martxan dago jadanik.
Enpresaren etorkizuneko erronkak dira segurtasun handiko piezetan espezializatzea eta negozioa dibertsifikatzea. “Punta-puntan egoten jarraitu nahi dugu automobilgintza sektorean, baina beste sektore batzuk ere bilatu nahi ditugu hazten jarraitzeko”.
Era berean, pertsonak inplikatzeko planari eutsiko diote. “Finean, enpresa sozial bat gara, eta langileak gurekin gelditzea nahi dugu. Horrek eragin positiboa du pertsonen inplikazioan. Administrazio-kontseilua enpresako bazkideek osatzen dute, eta informazioa irekia da. Geu gara enpresaren jabeak, eta kontratupeko langileak ere bazkide bihurtzen dira azkenean”.
Lotutako albisteak
Diker, osasungintzaren sektorerako injekzio bidezko plastikoetan Euskadi mailako erreferente bihurtu nahi duen ETEa
Oiartzungo enpresa, gaur egun, batez ere automobilgintzaren eta elektronikaren sektorearentzat ari da lanean
Talleres Altube, doitasuna nortasunean daraman Gipuzkoako mekanizazio-enpresa
Bergarako konpainiak SPRI Taldearen zibersegurtasun-programako laguntza bat jaso du, eta negozioa % 50 handitzea espero du 2027rako
Fecin, industriako eskuilagintzan espezializatuta 60 urte daramatzan Gipuzkoako ETEa
Deban kokatuta dagoen enpresa da Europa mailan sektore honetako bost fabrikatzaileetako bat eta SPRI Taldearen zibersegurtasun-programaren laguntza jaso du
ENSen kalifikazio gorena lortu du Izertisek, eta administrazio publikoen eta enpresen bazkide estrategiko gisa zuen posizioa indartu du
Informazioa kudeatzen duten sistema, aplikazio eta zerbitzuetan duen maila ezin hobea ziurtatu du aholkularitzak; Gasteizen du egoitza
Orbik Cybersecurity, Mondragon eta Ikerlanen arteko hitzarmen bati esker Eusko Jaurlaritzaren laguntzarekin kooperatiba bihurtu den lehen star-tup-a teknologikoa
Akordioak 10 milioi euro baino gehiago mobilizatuko ditu datozen lau urteetan, oinarri teknologikoko kooperatibak sortzeko